خطوة 1

بيحكولك عن سعادة البيبي و هو بيبصلك اثناء ما بيرضع

تقعدي مستنية اللحظة بشغف

بعدين تأتي اللحظة المرتقبة بوووووم

" ولا .. ولا .. انت باصص فين .. كوتي كوتي انا ماما .. يا بني بصلي هنا "

و تلاقي البيبي بيبص في اللا شئ لدرجة انك تتخضي :D

افتكر كنت باقول لجميلة كتير

" جميلة انتي شيفاني اصلا ..الو الو حول "

فانا فضلت محتارة لحد ما نزلت اغنية خطوة

الاغنية دي لخصتلك مراحل تطور نمو الطفل بس بدأ من الاخر للاول

خطوة يا صاحب الخطوة امشيلي لو خطوة..

كلمة ما بتطلبش غير كلمة ..

غمرة من عينك الغمزة..

نظرة ما بتطلبش غير نظرة .. :D

فعشان اي أم مستجدة متتخضتش هاقولها اللي قرأته عن مراحل النمو المتوقعة 

هنبدأ بالنظرة :D  

اولا : نظر الطفل :

عند الولادة 

البيبي نظره مقارنة بنظرنا بيبقى اقل وضوحا 40 مرة

يعني فعلا مش بيبقى شايفك في اول شهر_ عزيزتي الام الخبرة اللي عندها اربع عيال و كانت متخيلة الواد بيضحكلها معلش حقك عليه من الصدمة _

البيبي نظره بيبقى 

·        زي الصورة المهزوزة و ابيض و اسود

·        و عنيه الاتنين مش ماشين سوا _ يعني الواد ممكن يبان عنده حول  كمان _  

:D

·        و بناء عليه حركة ايده مش متسقة مع نظره لانه مش قادر يتابع بيه فوارد جدا تديله لعبة يديكي بالقلم هو بيلوش ميقصدش طفل برئ قدام هيشوف كويس و هتديله اللعبة يديكي بالقلم برضه  هيبقى قاصد و سعيد _ مفيش فايدة  

:D _

بس كل ده طبيعي اهم حاجة انه يقدر يفرق النور من الضلمة و يغمض اما يطلع للنور _ يعني متنوريش اللمبة التانية في الاوضة و تتخضي انه مغمضش :D _

تقدري تساعديه في الفترة دي :

• -         قربي وشك منه لحد 20 سم عشان يقدر يركز
• -          كروت ابيض و اسود و اطبعيها و سبيه يتنح و يتأمل و يركز فيها دوري في جوجل contrast cards

   

•     تخرجيه البلكونة الصبح و بالليل عشان تلاحظي تفاعله مع الضوء و كمان تساعديه يفرق الليل و النهار
• -         ملاية ابيض و اسود و يقعد على بطنه عليها 

• -         نور سهراية في الاوضة وقت النوم
• -         تكلميه باستمرار و انتي بتتحركي J

عند الثاني للثالث 

   البيبي نظره اتحسن لسه مهزوز بس اوضح من الاول و بدأ يشوف الوان

بدأ يقدر يتابع بنظره

-         تقدري تساعديه ب

•  صور و لعب ملونة مع الكروت الابيض و اسود
• -         تقربي حاجة من وشه و تحركيها في اتجاهات فوق تحت يمين شمال ياريت مش لعبة بصوت عشان ميبقاش ميلفش مع الصوت الله يباركلك :D

عند الثالث للرابع  

البيبي قادر يشوف وشك بوضوح و اهم حاجة انه بدأ يتابع الحاجات بنظره و ممكن كمان يضحكلك _ عاااا لقد هرمنا _ 

عند الخامس للثامن 

حركة ايده هتتسق مع نظرة هيمد يجيب لعبة عجباه _ اكتر لعبة هتعجبه لعبة يلا نشد ماما من شعرها لحد ما تصوت :D _

و هيبدأ في العمر ده يشوف صورة ثلاثية الابعاد لاول مرة  يعني انتي بالنسبة له كل ده شبه الصورة احادية البعد بتاعة INSIDE OUT  :D

تقدري تساعديه

-         بانك تلعمي معاه استغامية كتير

-          توريله صور و تقولي اسماء بصوت عالي

سن سنة

البيبي بقى بيشوف زي الكبير

https://www.whattoexpect.com/first-year/baby-vision

https://www.aoa.org/patients-and-public/good-vision-throughout-life/childrens-vision/infant-vision-birth-to-24-months-of-age

https://slideplayer.com/slide/8974244/