ليه متدخليش سيريلاك ؟

ليه متدخليش للبيبي سيريلاك ؟؟

سؤال بيتسأل كتير
هتلاقوا في الصور بوست كامل من جروب النونو هباكل ايه
ربنا يجازي صاحبته كل خير
موضحة مكونات السيريلاك و مخاطره و اضراره
بالتفصيل

و ده جزء من الكلام
" المقصود هنا بالسيرلاك هو كل منتجات وجبات الحبوب الجاهزه للاطفال باي ماركه ,
هيرو بيبي , ريري , ايا كان
مكونات سيرلاك الارز
1- دقيق الرز , يعني عادي رز وطحناه بقي دقيق
2- الي بعده هو حليب مجفف مقشود(خالي الدسم) يعني حليب بودره خالي الدسم
3-السكروز هو السكر , و السكر معروف انه ممنوع قبل عمر السنه ,
4- اولين النخيل و ده زيت رخيص , غني بالزيوت المهدرجه , تقيل جدا ع المعده لتسببه في امراض القلب و السكري والسرطان و امراض الدوره الدمويه
5- حامض زيت بذر اللفت منخفض الايروسيك باختصار دا الكانولا , و الايروسك دا ماده سامه فهو بيقلك انه منخفض الايروسك ,
6- زيت جوز الهند و زيت دوار الشمس , عدي بقي كام زيت دلوقت؟
- نيجي بقي للمهم , مالتودكسترين الي هو عباره عن سكر برده

اضرار استخدامه
اولا السيرلاك مسكر جدا بيخلي الطفل يرفض طعم الخضار و الفاكهه الي سكرها لا يقارن بحلاوه السيرلاك ,
قوام السيرلاك ناعم جدااا سهل البلع جدااا بيعود الطفل علي الاستسهال ورفض قوامات الاكل الخشنه ,
السيرلاك بيخلي البيبي يتخن علي الفاضي و بينصحو بيه الناس الكبار الي عايزه تتخن انها تاكل سيرلاك.
في دراسات بتقول ان الحليب لما بيخلطوه بالسيرلاك بيمنع امتصاص الجسم للكالسيوم و الي بيتسبب في هشاشه العظام , في بعض الاطفال السيرلاك بيسببلهم اسهال .
--------
السؤال التاني من ام تاتية
طيب ازاي في دكاترة بيوصفوه ؟
 ده في روشتة الفطام لاخصائي و استشاري و دكتوراه من جزر الباهاما كاتب فيها نبدأ بالسيريلاك و نحليه بالعسل كمان

مع احترامي للزملاء الاعزاء
مش كل الدكاترة مطلعين و متطورين في معلوماتهم
مش كل الدكاترة بيقروا و يدوروا على اصل كل معلومة
الطب فيه مهارة و صنعة زي اي صنعة
اوقات الدكاترة بيكتفوا اللي سمعوه و اتعلموا من ناس اكبر و توارثته الاجيال من غير ما ينقحوه
فكل الناس و البشر يؤخذ من كلامهم و يرد
كلامي او كلام الدكتور او اي كلام مش مقدس
فالخلاف اتحسم
و بقى اللي يحكم بينا
الطب المبني على الدليل
بمعنى اي موضوع محل خلاف بيتجمع كل الابحاث عنه و تتقارن من حيث جودتها و قوتها و اتعملت على كام مريض و تطلع توصيات بما يغلب عليه الظن طبقا للمجموع الابحاث ي
-----
سؤال تالت من ام تالتة
طيب ما زمان كانوا بيقولوا جانا ريري جانا سقفوا و قولوا معانا
و بعدها عملتوا ابحاث و ريري بقى وحش
مش ممكن تغيروا رأيكم بكرة تاني
اصدق انا في العلم و الابحاث دول ازاي ؟؟

وارد فعلا التوصيات الطبية تتغير بخصوص تغذية الاطفال
و الطب عموما بيطور
و دي حاجة تخلينا نصدق اكتر في الابحاث
لان البشر نفسهم مش ثابتين و صحتهم و ظروفهم دلوقتي مش زي من ١٠٠ سنة و لا حتى عشر سنين.
فطبيعي العلم يتغير لان ديما في ابحاث عشان تجاري تغير البشر ده
غير كده احنا كلنا بنجتهد كامهات نعمل احسن حاجة على قدر ما وصل لينا
لان البيبي ده و صحته امانة
في فرق كبير لما اقول يارب انا حاولت قد اللي وصلني
او اني نتجاهل وجود العلم اصلا بحجة انه بيتغير
او حتى بحجة ان الدكتور قالي
اعتقادي ان فطرة الامهات و احساسهم لو اتشال من عليهم غبارىالمعتاد و كلام الجدود ينطبق عليه استفت قلبك
-------
سؤال رابع
من ام رابعة
انا كلت عشرين تلاف علبة سيريلاك
و كويسة اهوه زي ما هو واضح
مش مقتنعة انا بصراحة بكل ده
وولادي اللي فاتوا كلهم كلوه و كويسين

عزيزتي الام
ممكن تعريف كلمة كويسين دي يعني ايه ؟؟
ام يبقى في اضرار بتاخد سنين عشان تبان مش معنى انها مبنتش انها مش هتحصل
مثلا الشرايين بتفضل زمن تراكم دهون عشان تكون جلطة
فمش معنى العيان لسه مجتلوش انها مش هتجي
كمان حتى لو احتمال
تخيلي باقولك ادي الاكل ده لابنك و احتمال يتعب تعب وحش
هتقولي و ماله هاجرب ؟! معتقدش
ت
-----
سؤال خامس
من ام خامسة
طيب الواد قغلت معاه و عاوز سيريلاك
تحضيره في البيت سهل جدا
رز و يتنقع
و قمح و يتنقع
و يتجفف في تفال في الفرن او على البوتجاز و يتطحن

و يتحلى بدبس تمر و فاكهة او يتضاف عليه خضار

ممكن شوفان و عليه مية مغلية و موز و تمر و يتساب عشر دقايق و يتضرب
ممكن شوفان مطحون
 
و في بدايل من الصديقة الجميلة تسنيم سليم
شوفان مستوي في مية سخنة وعليه قطع فواكه متفتفتة
جنين قمح مستوي برضو وعليه تمر أو زبيب
وقوامهم زي السريلاك للنونو اللي لسة بادئ ياكل ومعندوش سنان و طعمهم احلى
-----
سؤال سادس
طيب غير السيريلاك
لما احب ادور على معلومة اسال فين ؟؟
ببساطة ممكن تسالي عن دكتور ثقة في منطقتك او محافظتك
  _ ممكن الجروب النونو هياكل ايه +6 على الفيس بوك
ممكن تستعينوا بمقالات دكتورة منار مبارز صديقة و دكتورة ثقة مهتمة بتغذية الاطفال
https://www.ida2at.com/guide-baby-food-first-year/…
---

سؤال اخير
انا بقى مش مقتنعة برضه
و حاسة عادي يعني و ماله السيريلاك و الهيرو بيبي و اللبن و العسل و الملخ و السكر قبل السنة
براحتك طبعا
ده اختيارك الشخصي
محدش يقدر يجبرك على اللي شايفه صح
كل ام بتحاول و بتقرأ و بتحاول تنقل الدليل و العلم ده لغيرها
لكن من شاء قبله و من شاء رفضه
لما على الرسول الا البلاغ
الا هل بلغت
-------