الرضاعة الطبيعية : الكثير من التعب و الكثير من الحب أيضا :)

للامهات في اول ٣ شهور
اللي لسه بيعانوا في الرضاعة
انا جايلكم من المستقبل و باقولكم

 ابشششششر يا تيمور 😁

خلينا نتفق سوا على حبة حاجات طبيعي جدا تحصل
اولا
طبيعي لو بترضعي البيبي حسب الطلب تحسي انك بترضعي back to back
اللي هو رضعة تخلص رضعة تبدأ
لان معدتهم بتبقى صغيرة و اللبن سريع الهضم
و دي صورة بتوضح حجم معدة الرضيع و احتياجته التقريبية من اللبن

ثانيا
في عشرومية لالف و عشرومية طفرة نمو في الفترة دي فانتي مينفعش تنظمي الرضاعة
لان ساعتها انتاجك ثابت مقابل احتياجات البيبي اللي بتزيد

طفرة نمو : هي فترة بتتضاعف فيها احتياجات الطفل الرضيع و بيليها تطور ملحوظ في مهارته او نموه
اعراضها : هي زيادة في طلب الرضاعة ، اضطراب في نوم ، شدة في التعلق بالام و الرغبة في لاحتضان و الحمل ، زيادة في البكاء
اوقات حدوثها : اسبوع - اسبوعين - من 4 ل 6 اسابيع - 3شهور- 4 شهور - 6 شهور -9 شهور و اول ال 10 شهور- عند سنة - من سنة وشهرين ل سنة و5 شهور تقريبا  
ثالثا
الفترة بين الرضعة و الرضعة اللي بعدها
بتتحسب من معاد بداية الرضعة الاولى مش نهايتها
يعني مثلا بدأتي ترضعيه من ١٢ ل ١٢:٣٠
بعدها بربع ساعه اي الساعة ١٢:٤٥ سمعتي اااااء جعان يا ناس حرام عليكم
اذا احسبي الفترة بين الرضعتين في المسألة اعلاه
شاطرة من ١٢ ل ١٢:٤٥ يعني ٤٥ دقيقة
لكن انتي لو حسبتي من نهاية الرضعة هتلاقي نفسك بترضعي كل ربع ساعة  فنفسيا حتى هتتكدري 😂
رابعا
من بعد السادس ممكن تقدري تباعدي في فترة الرضاعة توصلي لساعه و نص او اتنين
في امهات اللهم بارك بيوصلوا لتلاته و اربع ساعات بس خلينا نتكلم في المتوسط الاقل و اللي ربنا رزقه باكتر فضل و نعمة
لو بالاقل فمتتضايقش و تكتأبي
خامسا
ممكن لو تقدري ترضعي بالساتر بره البيت هتتحركي اسهل
انا شخصيا معرفتش حتى الطرحة بغطي بيها نفسي مش جميلة و برضه بتشدها من عليه 😂😂 تحت شعار بتخبي ايه يا ماما عليه 😂😂 فبطلت الصراحة 😁
سادسا
" اقفلي موبايلك و هدي اعصابك و نفس عميق و غمضي عينك لا فتحي عينك بصي في عين البيبي امسكي ايده 😁 "
لا مش اوي كده 😂
المهم
ركزي مع البيبي وقت الرضاعة
متتغليش عنه بتلفزيون و لا موبايل و لا اغاني متخيلة انها بتسليكم
بالذات بالذات بالذات لو في صعوبات رضاعة
و لسه في الاول
و لسه بتحاولي تظبطي الالتقام latch
و تظبطي وضع الرضاعة
البيبي مش بيبقى شايفك كويس بس اكيد بيبقى حاسس
و كمان لانه بيبقى لسه مش ظابط نفسه كويس 😁 فبيبفصل كتير و محتاجك مركزة لما بتبقى مشغولة بالموبايل بتتكدري لانك بتحسي انه اما بيقطع في الرضاعة بيعطلك عن الحاجات اللي بتعمليها على الموبايل اللي هي غير مهمة على الاطلاق 😁 و ممكن تتعصبي كمان و خلقك يبقى اضيق
لما البيبي يبدأ يشوف ممكن يبقى عاطفي و يبصلك و يضحكلك 😁
جميلة عموما بتفضل متأملة في جمال السرير 😂😂 او الدولاب او حتى ابوها 😁 فانا مجربتش الاحساس بس بيقولوا حلو 😂
سابعا
ادعي كتير كتير كتير
خاصة وقت الرضاعة
ان ربنا يبعت للبيبي رزقه و انه ييسر الرضاعة ليكي و للبيبي و يهون عليكي صعوبتها
حتى لو بتعيطي وقت الرضاعة من الاحباط
قولي يارب
ثامنا
" الواد صغير كده ليه "
فيما يبدو و على ما يبدو البيبهات اللي بترضع طبيعي بيبقى شكلها مش مليان
فبتحسي يعني انه ابنك قطة في نفسه بياكل و ينكر و مطرح ما يسري مش بيمري خالص 😁
يعني انتي تقريبا بتتسفي و شعرك بيقع و صحتك بتروح و في الاخر تأتي امرأة عابرة في الطريق تكدرك
متزعليش انتي مش لوحدك احنا كتير 😁
و بالنسبة للناس الرخمة في الشارع و الفيس بوك و المواصلات اعملهم بلوق بلوق بلوق بلوق 😂 تجاهليهم يعني
اخيرا
لو هنتكلم كفنيين
الرضاعة صعبة يا جماعة
و مرهقة - لكن مش مؤلمة الالم معناه ان في مشكلة تحتاج استشاري رضاعة -
و محتاجة مجاهدة نفس

في عز الزهق و الصيف في عز الليل و الناس متكلفتة و اللي يقوم بيلبس زعبوطه و لكلوكه
انتي ترفعي هدومك و تستقبلي تيارات الهوا بشجاعة بقلب ميت عشان ترضعي الكائن الباكي ده اللي غالبا بياخد بؤين و ينام كانه صحي فتح باب التلاجة اطمن ان فيها اكل و قفل تاني بس معلش معلش 😂

لكن رغم كل ده الرضاعة امر عظيم
عظيم لدرجة ان ربنا يقول فيه
" وَأَوْحَيْنَا إِلَىٰ أُمِّ مُوسَىٰ أَنْ أَرْضِعِيهِ ۖ فَإِذَا خِفْتِ عَلَيْهِ فَأَلْقِيهِ فِي الْيَمِّ "
طيب ما كان ممكن تبقى فالقيه في اليم على طول
ده امر جلل لدرجة انه يذكر !
 و احسب ثوابه عند ربنا عظيم برضه

فرغم كل الصعوبات و الابتلائات هي نعمة و فضل من ربنا

فاللهم انا اصبحنا منك في نعمة و عافية و فضل
فاتمم علينا نعمتك و عافيتك و فضلك
يارب يسر و اعن كل ام بتحاول و تجاهد في الرضاعة
و قويها و اجعل كل التعب ده في ميزان حسناتها يارب و تم عليها الفضل و النعمة و قويها تتم الرضاعة على خير

تنويه: خاطرة الاية مش مني ابتداء جاتلي من اسم البوم في معلوماات عن الرضاعة من صفحة ثلاثون شهرا للصديقة الجميلة
 دكتورة منار مبارز :)

تنويه٢
في حال وجود اي صعوبات في الرضاعة ارجعي لاستشارية رضاعة في اقرب فرصة
الوقت ده زي الدهب كل يوم بيعدي و بتتأخري مش سهل
اتمنى كنت اقدر اساعد كل واحدة بس للاسف مش مأهلة لده
مثلا
متنظريش و البيبي مش بيرضع كويس و مش بيفضي صدرك
 لان ده ممكن يقلل اللبن لاىقدر الله و تدخلي في مشكلة من غير داعي
 بينم كان ابسط تتحل بدري ونظبط وضع رضاعة و بس